方力申等足25年圓紅館夢 5.16開騷 染金髮突破形象 尹光驚喜現身切磋波技 剛於2月底度過46歲生日嘅方力申（Alex），正式宣布將於5月16日（星期六）首度踏上紅磡香港體育館，舉行入行超過25年以來首個紅館個人演唱會《方力申 Perfect Moment 最佳時間演唱會2026》！
記者會由許紹雄女兒許惠菁主持，仲首播咗Alex全新歌曲《万刀甲》，更邀請到「波友」尹光驚喜現身，二人即席切磋乒乓球技，貫徹新歌鼓勵大家多做運動嘅主題。 從未諗過可以上紅館 最想講：山頂朋友你好！ 對於終於能夠踏上呢個香港歌手夢寐以求嘅舞台，Alex坦言從未諗過：「入行25年，真係冇諗過可以開紅館！尤其係我已經15年冇出過唱片，紅館對我嚟講係一個好遙遠嘅夢想。今次可以上到嚟，真係好緊張、好興奮！最開心係終於可以講一句：『山頂嘅朋友，你哋好！』」
感激太太旺夫兼囡囡腳頭好 去年豐收年 Alex特別多謝太太葉萱，形容舊年係豐收一年：「太太好犀利，旺我！游水學校搵到新場地、紅館又申請成功，仲有我哋嘅囡囡Isla出世，令我順利解鎖做爸爸嘅身份，真係好多謝佢哋！」佢仲笑言囡囡係「腳頭好」嘅小福星，事關多年來屢次申請紅館檔期都失敗，有咗囡囡之後即刻成功獲批。
金髮桃紅西裝突破形象 預告歌單有大量「第一次」 為配合首個紅館個唱，Alex一改以往健康陽光形象，喺宣傳海報中染上金髮兼着上桃紅色西裝，預示演唱會將有全新突破。佢透露今次演唱會嘉賓唔止一位，而歌單更係精心挑選：「今次歌單起碼有三分之一嘅歌，係之前七場內地巡迴演唱會冇唱過嘅，有啲重要嘅歌甚至係我第一次唱。因為紅館有一個好靚嘅舞台同製作，好適合將呢啲滄海遺珠呈現俾大家。」佢強調為咗以最佳狀態見歌迷，已經積極操練。
「波友」尹光驚喜現身 預告嘉賓唔止一個 記者會另一亮點，係與Alex私交甚篤、經常一齊打乒乓球嘅「波友」尹光驚喜現身，二人更即席切磋球技，場面熱鬧。Alex藉此宣揚多做運動嘅健康生活，並感激一眾好友包括投資方兼好友林盛斌（Bob）、鍾楚霖及劉浩龍嘅鼓勵同支持，幫佢圓夢。
