建銀國際亞洲三項鐵人青年及U23錦標賽2026 維港海濱爆發亞洲新星之戰 由建銀國際冠名贊助、中國香港三項鐵人總會主辦嘅「建銀國際亞洲三項鐵人青年及U23錦標賽 – 香港2026」，日前喺中環灣仔海濱激戰連場！率先上演男、女子青年同U23精英組賽事，吸引咗來自14個亞洲國家同地區、合共119位三鐵新星嚟港爭霸。港隊亦派出22位本地精英，藉住主場優勢同市民打氣，全力衝擊獎牌。 今次賽事繼去年「十五運」後，再次喺香港地標維港海濱舉行。參賽者要先喺維港游750米，然後踩住單車喺龍和道同國金一帶飛馳18公里，最後喺海濱長廊衝刺跑5公里，直奔添馬公園文化廣場衝線，沿途維港景致盡收眼底，挑戰同享受並存！
港隊U23雙星領軍 葉德朗、韋祺主場爭光 男子U23組別有首屆全國學生（青年）運動會銅牌得主葉德朗坐鎮，聯同葉子軒、霍泓軒等本地猛將力拼亞洲高手；女子U23就由全運會混合接力銀牌得主韋祺（Cade Wright）帶領妹妹韋禔（Tallulah Wright）同隊友出戰。青年組方面，去年亞洲U15賽封后嘅Sarah Modiano亦會領銜一眾小將，迎戰亞洲列強。 日本首日橫掃7獎牌成大贏家 哈薩克、南韓緊隨 首日賽事競爭激烈，女子青年組由哈薩克嘅Diana Yerzhanova（1小時01分59秒）奪冠，日本同南韓選手分列二、三。男子青年組就成為日本隊天下，內田煌乃亮同西崎大貴包辦金銀牌。女子U23組由南韓朴佳妍稱后，日本選手包辦亞季軍；男子U23組則係日本大島拓人同南韓金兌奇鬥到最後，結果大島以53分29秒、僅2秒之微贏出，再為日本多添一金。計首日戰績，日本隊共奪得3金2銀2銅，成為今日「獎牌大戶」。
壓軸係混合接力 青奧資格最後衝刺 賽事同樣精彩，先進行分齡組別比賽，到下晝兩點就會上演戲肉混合接力精英賽，預料鬥得更加激烈。另外，今次賽事亦係年底塞內加爾青年奧運會嘅亞洲區最後積分賽，青奧入場券誰屬，估計五月前有分曉。
海濱嘉年華同樂 睇比賽兼玩攤位 賽事期間，添馬公園文化廣場會變身三鐵嘉年華，有現場音樂、運動示範同多個互動攤位，等大家可以一邊睇比賽，一邊感受節日氣氛，過個刺激又好玩嘅周末 ，為香港同亞洲嘅三鐵新星打氣啦！
